Gjinekologu Curr Gjocaj, në një ligjëratë për “Inteligjenca n’3D”, sqaroi se kur është momenti i duhur për të nisur procedurat e IVF-it (fertilizimi i asistuar mjekësor). Ai theksoi se aplikimi i kësaj metode duhet të nis vetëm kur çiftet që kanë provuar të gjitha alternativat natyrore dhe nuk kanë arritur shtatzëni.
Gjocaj tha se IVF-i konsiderohet zgjidhja e fundit kur të gjitha procedurat e tjera për shtatzëni kanë dështuar. Sipas tij, kjo qasje mjekësore po bëhet gjithnjë e më e avancuar në nivel global dhe ka sjellë rezultate të prekshme edhe në vendet në zhvillim.
“Por edhe kur të konsumohen gjitha këto procedura dhe shihet se megjithatë çifti akoma nuk po mundet të ketë shtatzëninë e dëshiruar, atëherë sot, siç e dimë është një trend. Është bërë një zgjidhje shumë e mirë për këto çifte, siç janë procedurat e IVF-it, pra ose fertilizimit të asistuar mjekësor”, shpjegon Dr. Gjocaj.
Ai vuri në dukje se përparimi i IVF-it ka qenë i madh në nivel ndërkombëtar, si në vendet e zhvilluara ashtu edhe në ato në zhvillim. Sipas tij, edhe në sektorin publik në Kosovë po shihen hapa pozitivë drejt zbatimit të këtyre procedurave.
“Këto procedura në botë janë shumë përparimtare, sidomos në vendet në zhvillim, por edhe në vendet e zhvilluara. Për shembull, në vendin tonë në sektorin publik këto kohë të fundit kemi lëvizje shumë pozitive që një gjë e tillë do të ndodhë së shpejti”, thekson ai.
Gjocaj shtoi se sektori privat ka vite që aplikon IVF-in me sukses dhe tashmë në Kosovë ekziston një brez i tërë fëmijësh të lindur përmes këtyre procedurave.
“Jemi dëshmitarë që edhe para shumë viteve këto procedura janë aplikuar në sektorin privat me mjaft sukses dhe sot kemi një gjeneratë goxha numër të madh të fëmijëve që kanë lindur në këto procedura”, deklaron Curr Gjocaj.
Deklaratën e plotë të gjinekologut Curr Gjocaj në Inteligjenca n’3D, e gjeni në videon më poshtë:
